सरकारले लहान प्रादेशिक अस्पतालमा तत्काल अन्तरिम ट्रमा युनिट सञ्चालन गर्ने तयारी गरेको छ। प्रस्तावित क्रिटिकल केयर तथा ट्रमा सेन्टरको स्थायी संरचना निर्माण हुन समय लाग्ने भएकाले तत्काल उपचार सेवा उपलब्ध गराउने उद्देश्यले लहानमा अन्तरिम व्यवस्था गर्न लागिएको हो।
स्वास्थ्य तथा खाद्य स्वच्छता मन्त्री निशा मेहताले धनुषाको ढल्केबरमा प्रस्तावित Critical Care and Trauma Center निर्माण गर्ने योजना यथावत् रहेको स्पष्ट गरेकी छन्। लहानमा सञ्चालन गर्न लागिएको ट्रमा युनिट ढल्केबरको प्रस्तावित केन्द्रको विकल्प नभई तत्काल राहतका लागि गरिएको व्यवस्था भएको उनको भनाइ छ।
मन्त्रालयका अनुसार लहान प्रादेशिक अस्पतालमा सीटी स्क्यान, रक्तसञ्चार सेवा तथा ट्रमा उपचारका लागि उपयोग गर्न सकिने आवश्यक आधारभूत सुविधा उपलब्ध छन्। यही पूर्वाधार प्रयोग गरेर अन्तरिम ट्रमा सेवा सञ्चालन गर्ने तयारी गरिएको हो।
सडक दुर्घटना वा अन्य कारणले गम्भीर चोटपटक लागेका बिरामीको उपचारमा समय महत्वपूर्ण हुने भएकाले नजिकै ट्रमा सेवा उपलब्ध हुँदा बिरामीलाई टाढाका अस्पतालमा लैजानुपर्ने अवस्था कम गर्न सहयोग पुग्न सक्छ।
विशेषगरी मधेश क्षेत्रका गम्भीर दुर्घटनाका बिरामीलाई तत्काल विशेषज्ञ उपचार आवश्यक पर्दा काठमाडौं वा अन्य ठूला स्वास्थ्य संस्थामा लैजानुपर्ने बाध्यता रहँदै आएको अवस्थामा लहानमा ट्रमा युनिट सञ्चालनले उपचार पहुँच विस्तार गर्न मद्दत गर्ने अपेक्षा गरिएको छ।
ढल्केबरमा प्रस्तावित स्थायी क्रिटिकल केयर तथा ट्रमा सेन्टरको निर्माण योजना भने पूर्वनिर्धारित रूपमा अगाडि बढाइने सरकारले स्पष्ट पारेको छ।
० प्रतिक्रिया