राहदानी विभागको अनुरोध: अत्यावश्यक परे मात्र राहदानीका लागि आवेदन दिनुहोस्

काठमाडौं।
राहदानी विभागले नयाँ राहदानी प्रणाली पूर्ण रूपमा सञ्चालनमा आई स्थिर नहुन्जेलसम्म अत्यावश्यक आवश्यकता भएका सेवाग्राहीलाई मात्र राहदानीका लागि आवेदन दिन अनुरोध गरेको छ।
विभागका अनुसार नयाँ प्रणालीलाई प्रभावकारी रूपमा सञ्चालनमा ल्याउने प्रक्रिया जारी रहेकाले प्रारम्भिक चरणमा केही प्राविधिक समायोजन आवश्यक पर्न सक्छ। यस अवधिमा अत्यावश्यक नभएका सेवाग्राहीले केही समय पर्खेर आवेदन दिएमा सेवा व्यवस्थापन सहज हुने विभागको विश्वास छ।
विभागले सेवाग्राहीको सहयोगले नयाँ प्रणालीलाई छिट्टै स्थिर बनाउन र सेवाप्रवाहलाई थप प्रभावकारी बनाउन महत्त्वपूर्ण भूमिका खेल्ने जनाएको छ। साथै, प्रणाली पूर्ण रूपमा सञ्चालनमा आएपछि सबै सेवाग्राहीलाई सहज र छिटो सेवा उपलब्ध गराइने पनि विभागले स्पष्ट पारेको छ।
विदेश अध्ययन, रोजगारी, उपचार वा अन्य अत्यावश्यक कारणले तत्काल राहदानी आवश्यक परेका सेवाग्राहीलाई भने नियमित प्रक्रियाअनुसार सेवा उपलब्ध गराइने विभागले जनाएको छ।विभागले सेवाग्राहीलाई आधिकारिक सूचना तथा अद्यावधिक जानकारीका आधारमा मात्र आवेदन प्रक्रिया अघि बढाउन आग्रह गरेको छ।स्रोत: राहदानी विभाग | नेपालको आवाज संवाददाता | nepalkoaawaj.com