वासिङ्टन। अमेरिकाले आफ्नो स्थापनाको २५० वर्ष पूरा भएको अवसरमा राष्ट्रपति डोनाल्ड ट्रम्पको तस्बिर अंकित विशेष एक डलरको सिक्का सार्वजनिक गरी बिक्री सुरु गरेको छ। अमेरिकी मुद्रा इतिहासमा बहालवाला राष्ट्रपतिको तस्बिर अंकित सिक्का जारी भएको यो असाधारण घटना बनेको छ।

अमेरिकी टकसाल (U.S. Mint) ले ‘2026 Semiquincentennial President Donald J. Trump $1 Coin’ नाम दिएको सिक्काको रोल र ब्याग सेप्टेम्बर २ देखि बिक्रीमा राखेको हो। सिक्का फिलाडेल्फिया टकसालमा उत्पादन गरिएको छ।

सिक्काको अगाडिको भागमा ट्रम्पको आकृति छ। त्यससँगै ‘LIBERTY’, ‘IN GOD WE TRUST’ र अमेरिकाको २५०औँ वार्षिकोत्सव जनाउने ‘1776–2026’ अंकित गरिएको छ। यसको डिजाइन अमेरिकी टकसालका प्रमुख इन्ग्रेभर जोसेफ मेन्नाले तयार गरेका हुन्। डिजाइनका लागि ह्वाइट हाउसका फोटोग्राफर ड्यानियल टोरोकले खिचेको आधिकारिक तस्बिरलाई आधार बनाइएको अमेरिकी टकसालले जनाएको छ।

सिक्काको पछाडिको भागमा अमेरिकी राष्ट्रपतिको आधिकारिक छाप (Presidential Seal) राखिएको छ। चील, जैतुनको हाँगा र तीरसहितको उक्त डिजाइनमा अमेरिकाको २५० वर्षलाई जनाउने ‘250’ समेत समावेश गरिएको छ। साथै ‘UNITED STATES OF AMERICA’ र ‘ONE DOLLAR’ लेखिएको छ।

यो सुनको सिक्का भने होइन। अमेरिकी टकसालका अनुसार यसको संरचनामा मुख्य रूपमा तामा तथा जिंक, म्याङ्गानिज र निकेल प्रयोग गरिएको छ। सिक्काको तौल ८.१० ग्राम र व्यास २६.४९ मिलिमिटर छ। यसको अंकित मूल्य एक अमेरिकी डलर हो।

टकसालले २५ वटा सिक्का भएको एउटा रोल ६१ डलर तथा १०० वटा सिक्का भएको ब्याग १५४.५० डलरमा बिक्रीमा राखेको छ। पहिलो २४ घण्टामा प्रत्येक उत्पादनका लागि एउटा परिवारले अधिकतम दुईवटा अर्डर गर्न पाउने सीमा तोकिएको थियो।

यस संस्करणलाई थप विशेष बनाउन जुलाई ४ मा फिलाडेल्फिया टकसालमा २ लाख ५० हजार सिक्का विशेष ‘July 4th’ चिन्हसहित उत्पादन गरिएको थियो। ती सिक्का बिक्री गरिएका रोल र ब्यागमा अनियमित रूपमा मिसाइएको अमेरिकी टकसालले जनाएको छ।

जीवित व्यक्तिको आकृति अमेरिकी मुद्रामा प्रयोग गर्ने विषय लामो समयदेखि कानुनी तथा ऐतिहासिक रूपमा संवेदनशील मानिन्छ। तर यसअघि सन् १९२६ मा अमेरिकाको १५०औँ वार्षिकोत्सवका अवसरमा तत्कालीन राष्ट्रपति क्याल्भिन कुलिजको आकृति स्मारक सिक्कामा राखिएको थियो। पछिल्लो ट्रम्प सिक्काले त्यस घटनाको एक शताब्दीपछि बहालवाला अमेरिकी राष्ट्रपतिलाई फेरि अमेरिकी सिक्कामा ल्याएको छ।

ट्रम्पको तस्बिर भएको यो सिक्का अमेरिकाको २५०औँ वार्षिकोत्सवसँग सम्बन्धित विशेष संस्करण भए पनि यसको अंकित मूल्य एक डलर नै हो। अमेरिकी टकसालले यसलाई आधिकारिक रूपमा जारी गरेको मुद्रा तथा सङ्कलनयोग्य उत्पादनका रूपमा बिक्री गरिरहेको छ।