चितवनमा गुडिरहेको विद्युतीय कारमा आगलागी, एक जनाको मृत्यु

चितवनमा गुडिरहेको विद्युतीय कारमा आगलागी, एक जनाको मृत्यु
चितवन, भदौ २६ । चितवनको भरतपुर महानगरपालिका–९ स्थित बसन्तचोक नजिकै गुडिरहेको विद्युतीय कारमा अचानक आगलागी हुँदा एक जनाको जलेर मृत्यु भएको छ।
शुक्रबार बिहान करिब ६ बजे पूर्वबाट पश्चिमतर्फ जाँदै गरेको बागमती प्रदेश ०१–०३० च ५५७९ नम्बरको विद्युतीय कारमा पूर्व–पश्चिम राजमार्गको सर्भिस लेनमा आगलागी भएको हो।
आगलागीको सूचना पाएलगत्तै प्रहरी टोली घटनास्थलमा पुगेको थियो। दमकलको सहयोगमा आगो नियन्त्रणमा लिएपछि कारभित्र एक जना व्यक्ति जलेर मृत अवस्थामा फेला परेको प्रहरीले जनाएको छ।
आगलागीबाट कार पूर्णरूपमा जलेर क्षतिग्रस्त भएको छ। मृतकको पहिचानसम्बन्धी विवरण प्रारम्भिक समाचारमा स्पष्ट नभएको र घटनाको थप अनुसन्धान भइरहेको प्रहरीले जनाएको छ।
कारमा आगो कसरी लाग्यो भन्ने कारण भने हालसम्म खुल्न सकेको छैन। प्रहरीले घटनाको कारणबारे अनुसन्धान अघि बढाएको जनाएको छ।