काठमाडौं — चिनियाँ अटोमोबाइल निर्माता चांगानअन्तर्गतको नयाँ इलेक्ट्रिक एसयूभी Deepal Nevo Q05 नेपाली बजारमा भित्रिने तयारीमा छ। नेपालका लागि चांगानको आधिकारिक वेबसाइटमा समेत NEVO Q05 ‘arriving soon in Nepal’ भन्दै सार्वजनिक गरिएको छ।
नयाँ Q05 को प्रमुख विशेषतामध्ये उच्च क्षमताको डीसी फास्ट चार्जिङ रहेको छ। उपलब्ध अन्तर्राष्ट्रिय विवरणअनुसार यसले अधिकतम १६२ किलोवाटसम्म डीसी फास्ट चार्जिङ सपोर्ट गर्छ। उपयुक्त फास्ट चार्जर प्रयोग गर्दा ब्याट्रीलाई ३० प्रतिशतबाट ८० प्रतिशतसम्म करिब १५ मिनेटमा चार्ज गर्न सकिने उल्लेख छ।
चीनमा बिक्री हुने Q05 मा ४०.३ र ५१.९ किलोवाट आवर क्षमताका ब्याट्री विकल्प उपलब्ध छन्। ठूलो ब्याट्री भएको संस्करणले CLTC मापदण्डअनुसार एकपटकको पूर्ण चार्जमा अधिकतम ५०६ किलोमिटरसम्मको दाबी गरिएको रेन्ज दिन्छ। गाडीमा फ्रन्ट-माउन्टेड १२० किलोवाट मोटर प्रयोग गरिएको अन्तर्राष्ट्रिय विवरणमा उल्लेख छ।
Q05 को डिजाइन चांगानको ‘Digital Wing 2.0’ अवधारणामा आधारित छ। यसको लम्बाइ ४,४३५ एमएम, चौडाइ १,८५५ एमएम र उचाइ १,६०० एमएम छ भने ह्विलबेस २,७३५ एमएम रहेको छ।
क्याबिनमा ठूलो टचस्क्रिनसहित आधुनिक कनेक्टेड प्रविधि तथा चालक सहायता प्रणाली उपलब्ध हुने बताइएको छ। चांगान नेपालले आफ्नो आधिकारिक पेजमा १४.६ इन्च एचडी टचस्क्रिन, इन्टेलिजेन्ट ड्राइभर असिस्टेन्स र अल्ट्रा-फास्ट चार्जिङलाई प्रमुख विशेषताका रूपमा प्रस्तुत गरेको छ।
नेपालमा बिक्री हुने भेरियन्ट, ब्याट्री तथा मोटरको अन्तिम स्पेसिफिकेसन र आधिकारिक मूल्य भने कम्पनीले सार्वजनिक गरिसकेको छैन। त्यसैले अन्तर्राष्ट्रिय बजारका सबै स्पेसिफिकेसन नेपाली संस्करणमा समान हुने निश्चित छैन।
० प्रतिक्रिया