शंकर ग्रुपका अध्यक्ष शंकरलाल अग्रवाललाई बैंकिङ कसुरसम्बन्धी मुद्दामा प्रहरीले पक्राउ गरेको छ। प्रहरीको केन्द्रीय अनुसन्धान ब्यूरो (सिआइबी) ले बुधबार काठमाडौंको डिल्लीबजार क्षेत्रबाट उनलाई नियन्त्रणमा लिएको हो।
सिआइबीका अनुसार अग्रवालविरुद्ध विभिन्न बैंकबाट लिइएको कर्जाको दुरुपयोग गरेको अभियोगमा यसअघि नै पाटन उच्च अदालतमा मुद्दा दायर गरिएको थियो। उक्त मुद्दापछि उनी अदालतको सम्पर्कमा नआएपछि पक्राउ प्रक्रिया अघि बढाइएको जनाइएको छ।
अनुसन्धानका क्रममा जगदम्बा स्टिल्सको नाममा विभिन्न बैंकबाट लिइएको ४२ करोड १४ लाख रुपैयाँ दुरुपयोग भएको आरोप लगाइएको छ। सोही प्रकरणमा शंकरलाल अग्रवाल, उनका छोरा साहिल अग्रवाल, सुलभ अग्रवाल तथा बिचौलिया दीपक भट्टविरुद्ध गत २८ जेठमा मुद्दा दर्ता गरिएको थियो।
सिआइबीका प्रवक्ता अनुपमशमशेर जबराका अनुसार पक्राउ परेका अग्रवाललाई कानुनी प्रक्रिया पूरा गरी बिहीबार अदालतमा उपस्थित गराइने तयारी गरिएको छ। प्रहरीले यस प्रकरणमा थप अनुसन्धान जारी रहेको जनाएको छ।