काठमाडौं । प्रधानमन्त्री बालेन्द्र शाह र कानून, न्याय तथा संसदीय मामिलामन्त्री सोबिता गौतमबीच आर्थिक वर्ष २०८३/८४ का लागि कार्यसम्पादन सम्झौता भएको छ।

मन्त्री गौतमले सामाजिक सञ्जालमार्फत प्रधानमन्त्री र कानून, न्याय तथा संसदीय मामिलामन्त्रीका रूपमा आफूबीच चालु आर्थिक वर्षको कार्यसम्पादन सम्झौता भएको जानकारी दिएकी हुन्।

उनले सार्वजनिक गरेको तस्बिरमा प्रधानमन्त्री शाह र मन्त्री गौतम सम्झौतासम्बन्धी दस्तावेजसहित देखिएका छन्। गौतमले सम्झौताबारे जानकारी दिँदै लेखेकी छन्, “आज सम्माननीय प्रधानमन्त्री र कानून, न्याय तथा संसदीय मामिला मन्त्रीका रूपमा आ.व. २०८३/०८४ को कार्यसम्पादन सम्झौता गरेको छु।”

कार्यसम्पादन सम्झौताले सम्बन्धित मन्त्रालयले आर्थिक वर्षभरि सम्पादन गर्ने काम, नीति तथा कार्यक्रम कार्यान्वयन र परिणामप्रतिको जिम्मेवारीलाई व्यवस्थित गर्न आधार प्रदान गर्छ।

गौतम हाल कानून, न्याय तथा संसदीय मामिला मन्त्रालयको जिम्मेवारीमा छिन्। यसअघि पनि उनले कानुन निर्माण तथा संसदीय प्रक्रियालाई प्रभावकारी बनाउने विषयमा विभिन्न पहल गर्दै आएकी छन्।

सामाजिक सञ्जालमा सार्वजनिक गरिएको विवरणमा सम्झौताभित्र समेटिएका लक्ष्य, सूचक तथा समयसीमाको विस्तृत विवरण भने उल्लेख गरिएको छैन। त्यसैले सम्झौतामा समावेश भएका विशिष्ट कार्यक्रम वा लक्ष्यबारे थप विवरण सार्वजनिक भएपछि मात्र स्पष्ट हुनेछ।