काठमाडौं।
डिजिटल भुक्तानी सेवा प्रदायक खल्ती ले प्रयोगकर्ताका लागि नयाँ डिजिटल कार्ड सेवा सार्वजनिक गरेको जनाएको छ। यस सेवामार्फत अब प्रयोगकर्ताले कुनै भौतिक कार्ड आवश्यक नपरी मोबाइलबाटै सुरक्षित रूपमा अनलाइन (ई–कमर्स) कारोबार गर्न सक्नेछन्।
खल्टीका अनुसार डिजिटल कार्ड प्रयोग गरी गरिने अनलाइन भुक्तानीका लागि छुट्टै डेबिट वा क्रेडिट कार्ड आवश्यक पर्दैन। प्रयोगकर्ताले मोबाइलमार्फत नै तत्काल डिजिटल कार्ड प्रयोग गरी विभिन्न अनलाइन सेवामा भुक्तानी गर्न सक्ने व्यवस्था गरिएको छ।
यस प्रणालीमा गरिने भुक्तानी खल्ती वालेटमा रहेको मौज्दात रकमबाट हुने बताइएको छ। यसले अनलाइन खरिद तथा डिजिटल भुक्तानीलाई थप सहज, छिटो र सुरक्षित बनाउने अपेक्षा गरिएको छ।
डिजिटल भुक्तानीको प्रयोग बढ्दै गइरहेको अवस्थामा यस्तो सेवाले नगदरहित कारोबारलाई थप प्रोत्साहन गर्ने विश्वास गरिएको छ। साथै, भौतिक कार्ड बोक्नुपर्ने आवश्यकता कम हुनुका साथै मोबाइलबाटै सुरक्षित रूपमा कारोबार गर्न सकिने भएकाले प्रयोगकर्तालाई सुविधा थपिने अपेक्षा गरिएको छ।
खल्तीले आफ्ना सेवाहरूलाई समयानुकूल प्रविधिसँग जोड्दै डिजिटल वित्तीय सेवाको पहुँच विस्तार गर्ने उद्देश्यअनुसार यो सुविधा ल्याएको जनाएको छ। सेवाको प्रयोगसम्बन्धी थप जानकारी खल्तीको आधिकारिक माध्यमबाट प्राप्त गर्न सकिनेछ।