एआई संगीत निर्माण प्लेटफर्म सुनो (Suno AI) मा ठूलो साइबर आक्रमण भएको दाबी गरिएको छ। घटनामा करिब साढे ५ करोड प्रयोगकर्तासँग सम्बन्धित डेटा प्रभावित भएको बताइएको छ।
प्रकाशित विवरणअनुसार चुहिएको जानकारीमा प्रयोगकर्ताको ईमेल ठेगाना, फोन नम्बर तथा केही भुक्तानीसम्बन्धी विवरण समावेश छन्। पेमेन्ट पार्टनर Stripe सँग सम्बन्धित केही रेकर्डमा प्रयोग गरिएको क्रेडिट कार्डको प्रकार, कार्डको म्याद समाप्त हुने मिति तथा कार्डका अन्तिम चार अंक समेत समावेश रहेको उल्लेख गरिएको छ। पूर्ण कार्ड नम्बर वा CVV सार्वजनिक भएको पुष्टि भने गरिएको छैन।
समाचारअनुसार यो घटनाले विश्वभरका प्रयोगकर्तालाई असर पार्न सक्ने भएकाले नेपाली प्रयोगकर्ता पनि प्रभावित भएको हुनसक्ने सम्भावना औँल्याइएको छ। यद्यपि, कति नेपाली प्रयोगकर्ताको विवरण प्रभावित भयो भन्ने आधिकारिक विवरण सार्वजनिक गरिएको छैन।
साइबर सुरक्षाविज्ञहरूले यस्ता घटनापछि प्रयोगकर्तालाई आफ्नो पासवर्ड परिवर्तन गर्न, दुई-तह प्रमाणीकरण (2FA) सक्रिय गर्न तथा बैंक तथा डिजिटल भुक्तानी खाताको गतिविधि नियमित रूपमा निगरानी गर्न सुझाव दिएका छन्। साथै, शंकास्पद इमेल वा लिंकमा क्लिक नगर्न पनि आग्रह गरिएको छ।