काठमाडौं — प्रधानमन्त्री वालेन्द्र शाहको स्वकीय सचिवालयमा हालसम्म २७ जना पदाधिकारी तथा कर्मचारी नियुक्त गरिएको विवरण सार्वजनिक भएको छ। प्रधानमन्त्रीको स्वकीय सचिवालयका लागि कुल ४८ जनाको दरबन्दी रहेको जानकारी प्रधानमन्त्री तथा मन्त्रिपरिषद्को कार्यालयले दिएको हो।

यो विवरण नेपाली कांग्रेसकी सांसद सीता थपलियाले सूचनाको हक प्रयोग गरी मागेपछि प्रधानमन्त्री तथा मन्त्रिपरिषद्को कार्यालयले उपलब्ध गराएको हो। कार्यालयका सचिव पुष्कर सापकोटाका अनुसार नियुक्तिहरू ‘प्रधानमन्त्रीको सल्लाहकार र सचिवालय व्यवस्थापन कार्यविधि, २०७४’ बमोजिम गरिएको हो।

उपलब्ध विवरणअनुसार प्रधानमन्त्रीको सचिवालयमा मन्त्रीसरह सुविधा पाउने दुई सल्लाहकार नियुक्त छन्। प्रमुख सल्लाहकारका रूपमा कुमार बेन (व्यञ्जनकार) र राजनीतिक सल्लाहकारका रूपमा असीम शाह कार्यरत छन्। त्यस्तै राज्यमन्त्रीसरह सुविधा पाउने नीति, प्रशासन तथा सुशासन सल्लाहकारका रूपमा सुदीप ढकाल तथा सूचना तथा सञ्चार प्रविधि सल्लाहकारका रूपमा विवेक मिश्र नियुक्त भएका छन्। साथै अवैतनिक स्वास्थ्य सल्लाहकारका रूपमा प्रा.डा. जगदीशप्रसाद अग्रवाल रहेको जानकारी पनि सार्वजनिक गरिएको छ।

प्रधानमन्त्री शाह नेतृत्वको सरकार गठन भएको करिब चार महिना पुग्न लाग्दासम्म सचिवालयको संरचना र कर्मचारी संख्याबारे औपचारिक जानकारी सार्वजनिक नभएको अवस्थामा सूचनाको हकमार्फत यो विवरण बाहिर आएको हो। समाचारअनुसार प्रधानमन्त्री कार्यालयको वेबसाइटमा समेत सचिवालयका सबै पदाधिकारीको विवरण अद्यावधिक गरिएको छैन।

सांसद थपलियाले सचिवालयमा कार्यरत कर्मचारीको संख्या, कानुनी आधार, सेवासुविधा, सवारी सुविधा, मासिक खर्च, टेलिफोन, इन्धन, खाजा लगायत राज्यकोषमा पर्ने खर्चसम्बन्धी विस्तृत विवरण पनि माग गरेकी थिइन्। तर प्रधानमन्त्री कार्यालयले उपलब्ध गराएको सूचनामा सचिवालयको मासिक खर्च, सवारी सुविधा तथा राज्यकोषमा पर्ने कुल आर्थिक भारबारे विस्तृत विवरण समावेश गरिएको छैन।

यसैबीच प्रधानमन्त्री कार्यालयले मन्त्री तथा राज्यमन्त्रीहरूको स्वकीय सचिवालय सम्बन्धी व्यवस्था पनि स्पष्ट गरेको छ। कार्यविधिअनुसार उपप्रधानमन्त्री, मन्त्री र राज्यमन्त्रीको सचिवालयमा तोकिएको दरबन्दी, कर्मचारी संख्या र सेवासुविधा कानुनी व्यवस्थाअनुसार निर्धारण हुने उल्लेख गरिएको छ।