काठमाडौं। फिफा विश्वकप २०२६ को उपाधिका लागि अर्जेन्टिना र स्पेन आमनेसामने हुने भएपछि प्रविधि कम्पनी गुगलले आफ्नो लोगोमा विशेष परिवर्तन गरेको छ।
गुगलले विश्वकपको फाइनल खेललाई केन्द्रमा राखेर आफ्नो सर्च इन्जिनको गृहपृष्ठमा विशेष ‘डुडल’ सार्वजनिक गरेको हो। उक्त डुडलमार्फत फाइनलमा पुगेका अर्जेन्टिना र स्पेनलाई सम्मान गरिएको छ।
गुगलले विशेष दिवस, अन्तर्राष्ट्रिय प्रतियोगिता, ऐतिहासिक घटना तथा चर्चित व्यक्तित्वको सम्झनामा आफ्नो नियमित लोगो अस्थायी रूपमा परिवर्तन गर्दै आएको छ। यसरी तयार पारिने विशेष लोगोलाई ‘गुगल डुडल’ भनिन्छ।
सन् २०२६ को फिफा विश्वकप फाइनलमा अर्जेन्टिना र स्पेन प्रतिस्पर्धा गर्दै छन्। खेल आइतबार, जुलाई १९ मा अमेरिकाको न्यु जर्सीस्थित न्यूयोर्क–न्यु जर्सी स्टेडियममा हुने तालिका छ। स्पेनले सेमिफाइनलमा फ्रान्सलाई २–० ले हराउँदै फाइनलमा स्थान बनाएको थियो भने अर्जेन्टिनाले इंग्ल्यान्डलाई २–१ ले पराजित गरेको थियो।
विश्वकपजस्तो विश्वव्यापी खेलकुद प्रतियोगितालाई लक्षित गरी गुगलले विभिन्न देश र खेलसँग सम्बन्धित डुडल सार्वजनिक गर्दै आएको छ। यसपटकको डुडलले अर्जेन्टिना र स्पेनबीचको बहुप्रतीक्षित उपाधि भिडन्तलाई डिजिटल रूपमा प्रस्तुत गरेको छ।
